Қостанай облысына қарасты Рудный қаласында полиция қызметкерлерінің жедел әрекет етуінің арқасында хабар-ошарсыз кеткен 12 және 13 жастағы екі жасөспірім қыз аман-есен табылды, деп хабарлайды Alash.kz.
Қайғылы жағдайдың алдын алған іздестіру операциясы 31 қазан күні кешкі сағат 20:30 шамасында басталды. Рудный қалалық Полиция басқармасына кәмелетке толмаған екі тұрғынның жоғалғаны жөнінде ресми дабыл түскен бойда, құқық қорғау органдары дереу әрекетке көшті. Ақпарат түсе салысымен полицияның бүкіл жеке құрамы мен патрульдік экипаждары аяғынан тік тұрып, аумақты шарлауға жұмылдырылды.
Нәтижесінде жылдам қимылдайтын арнайы жасақ қызметкерлері жүргізген жедел-іздестіру шаралары өз жемісін беріп, жоғалған қыздардың орны небәрі бір жарым сағаттың ішінде анықталды. Тәртіп сақшылары жасөспірімдерді Рудный қаласындағы Парковая көшесінің бойынан тапты.
Қазіргі уақытта екі қыздың да өмірі мен денсаулығына төніп тұрған ешқандай қауіп жоқ, олар дін-аман түрде ата-аналарының қолына тапсырылды. Осы оқиғадан кейін полиция өкілдері барша ата-аналарға ескерту жасап, балалардың жүрген жерін үнемі қадағалап, олармен тұрақты түрде байланыста болу қажеттігін тағы бір мәрте еске салады.
