Құрылыс саласының жұмысшылары Қазақстанда енгізілген бірыңғай уақыт белдеуіне наразылық білдіріп, e-petition порталы арқылы бұрынғы уақытты қайтаруды талап ететін жаңа петиция жариялады, деп жазады Alash.KZ сайты Orda.kz порталына сілтеме жасап.
Өтініш авторларының айтуынша, жаңа уақытқа көшу құрылыс жұмыстарының сапасына кері әсерін тигізіп, жұмысшылардың денсаулығына зиян келтіріп, компания шығындарын арттырған. Құрылысшылар уақытты өзгерту туралы шешім нақты өндірісте еңбек ететін мамандардың пікірін ескермей қабылданғанын алға тартады.
Олардың мәлімдеуінше, құрылыс-монтаждау жұмыстарын бақылау әлсіреп, инженерлік және қасбеттік шешімдердің сапасы төмендеген. Сонымен қатар күндізгі жарықтың жетіспеушілігі салдарынан құрылыс материалдарын қабылдау кезінде қиындықтар туындап отыр.
Құрылыс саласы өкілдері электр энергиясын тұтынудың өсуі мен жұмысшылардың биологиялық ырғағының бұзылуын да ерекше атап өтті. Соның салдарынан қызметкерлер тез шаршап, еңбек өнімділігі төмендейді. Бұл жағдай тек салаға ғана емес, өңірлік экономиканың жалпы көрсеткіштеріне де әсер етіп отырғаны айтылды.
Айта кетейік, Қазақстан 2024 жылдың 1 наурызынан бастап UTC+5 бірыңғай уақыт белдеуіне көшті. Алайда содан бері бұл өзгеріске ел тұрғындарының бір бөлігі әлі де бейімделе алмай келеді. Әсіресе Шығыс Қазақстан облысының тұрғындары бұрынғы уақыт белдеуін қайтару мәселесін қайта көтере бастады. Қазіргі таңда Өскемен мен Риддер қалаларында сағат 15:00 шамасында қараңғылық түседі.
Еске сала кетсек, өткен жылы Министрлер кабинеті Қазақстанды біртұтас уақыт белдеуіне көшіру туралы шешімді бекіткен болатын. Сол кезде бұл бастамаға шамамен он миллионға жуық азамат қарсы шыққан. Ал 2024 жылдың мамыр айында бірыңғай уақыт белдеуін жоюды талап еткен петицияға 37 мың адам қол қойған.
Осыған байланысты Сауда және интеграция министрі Арман Шаққалиев Шығыс Қазақстан тұрғындарының наразылығына қатысты түсініктеме берген еді. Бұл мәселеге Мемлекет басшысы Қасым-Жомарт Тоқаев та назар аударып, Бурабайда өткен IV Ұлттық құрылтай барысында бірыңғай уақыт белдеуіне көшу арнайы ғылыми зерттеулер негізінде қабылданғанын мәлімдеген болатын.
Соған қарамастан, нақты өндіріс пен қызмет көрсету саласында еңбек ететін көптеген мамандар бірыңғай уақыттың жұмыс барысындағы тиімсіз тұстары басым екенін айтып, бұрынғы уақытты қайтару үмітін әлі де үзген жоқ. Қоғам арасында Үкімет мәселені кабинет шеңберінде ғана емес, нақты экономикалық және әлеуметтік салдарларын ескере отырып, жан-жақты қарастырады деген сенім сақталып отыр.
