Аталған анимациялық жоба қазақ үшін қадірлі «Алтын адамның» рухани маңызын ашып көрсетуді мақсат етті. Жоба «Ұлттық киноны қолдау мемлекеттік орталығына» 2020 жылы ұсынылып, басталған. Жалпы құны - 378 млн теңге. Келісімшарт бойынша киножоба 2021 жылы аяқталуы тиіс болатын. Бірақ орындаушы міндеттемелердің үдесінен шықпай, жұмысты толық аяқтамаған және фильмді белгіленген уақытта өткізбеген.
Осылайша, жобаны жүзеге асыру мерзімі жоспарланған 2020-2021 емес, 2020-2023 жылдар аралығында созылды. Жүзеге асыру мерзімі ұзарғаннан кейін жоба 2023 жылы нақты әрі толыққанды аяқталуы тиіс болатын.
"Алайда, 2023 жылдың соңында да орындаушы Сараптама кеңесі енгізген 126 ескертуді елемегені анықталды деп жазды Dalanews.kz. Осыған байланысты «Ұлттық киноны қолдау мемлекеттік орталығы» қалыптасқан жағдайды назарға ала отырып, жобаның үш жылға дейін созбалаңға салынуы турасында бір тоқтамға келуі тиіс болды.
Орындаушыға атқарылған жұмыс үшін жалпы құны 294 млн теңге төленді. Алайда, қолданыстағы заңнамаға сәйкес, аяқталмаған жобаларға мемлекет қаржы бөлуге қауқарсыз екенін айта кеткен жөн. Осыған байланысты қалған 84 миллион теңге республикалық бюджетке қайтарылды. Сондай-ақ, 2023 жылдың соңында анимациялық жоба тапсырылмағандықтан «Ұлттық киноны қолдау мемлекеттік орталығы» сотқа шағым түсіруге мәжбүр болды", - дейді орталық өкілдері.
«Ұлттық киноны қолдау мемлекеттік орталығының» Басқарма төрағасы Құрманбек Жұмағали әлеуметтік желідегі постында бұл мәселеге қатысты пікір білдірген болатын.
«Қазақфильм» тізгініндегі Азамат Сатыбалдымен бір ай бұрын атқарушылық іс жүргізу шеңберінде медиативтік келісім жасауға уағдаластық» деді ол жазбасында.
Ендігі кезекте «Қазақфильмнің» жобаға жауапты ұжымы фильмді өзара келісім арқылы аяқтап, «Алтын адам» анимациялық фильмін прокатқа шығарады. Одан түскен таза табыстың 20%-ы Кино орталығына аударылса, қалған 80%-ы «Қазақфильмнің» үлесінде қалады. Осылайша «Қазақфильм» ұлттық киностудиясы аталған жобаның түсірілім тобы алдындағы берешегін өтейді.
Айта кету қажет, мемлекеттік қаржыландыруды ұсынатын бірыңғай оператор ретіндегі «ҰКҚМО» қызметі ұлттық кинематографияны қаржылай қолдауға және «ҰКҚМО» жарғысына сәйкес, өнімдердің сапалы шығуы мен бөлінген қаржының мақсатты жұмсалуын қадағалауға құрылған. Осыған байланысты барлық сауалдар құқықтық негізде және Қазақстан Республикасының заңнамасына сай шешімін табады.
Ал Құрманбек Жұмағали Ұлттық киноны қолдау орталығының тайқазаны сіз бен біздің қаржымыздан құралғанын айтты.
«Сондықтан әр тиынның сұрауы барын ескеруіміз қажет. Мәселенің заң тұрғысынан шешіліп жатқаны да содан. Біз тек бәрі заң аясында шешілсе дейміз. Әйтпесе, «Қазақфильм» басшысы Азамат Сатыбалдымен араздығымыз жоқ. «Өсер елдің баласы бірін бірі батыр дер» демекші, Азамат екеуміз де отандық киноның дамуына мүдделіміз және бір-бірімізді қолдауға дайынбыз», - дейді ол.
Құрманбек Жұмағали кино саласын кері тартатын топ бар екенін айтты.
«Біздің байқауымызша, елдің кино саласын кері тартып, дамығанын қаламайтын белгісіз топтар бар секілді. Әрине, олардың негізсіз пікіріне көпшіліктің иланбағаны абзал. «Өтіріктің құйрығы бір-ақ тұтам» дегендей, саланың тек кемшілігін санамалауға бейім адамдардың астыртын ниеті түбі әшкере болатыны сөзсіз. Мұндай қолайсыз жағдайды тудыратын жағымсыз пікірлерге қарамастан, біз дамуға бет түзеген бағытымыздан жаңылмай, жұмыстарымызды үздіксіз жалғастыра береміз. Бір сөзбен айтқанда, елдің кино саласын ілгері бастыруға бар күшімізді саламыз», - дейді ол.
