Ақтөбе қаласының Бөгенбай батыр көшесінде орналасқан автожанармай құю станциясының аумағында жеңіл автокөлік отқа оранып, салдарынан екі жасөспірім мен бір ересек адам қаза тауып, тағы бір азамат ауруханаға жеткізілді, деп хабарлайды Alash.kz.
Төтенше жағдайлар департаментінің кезекші бөліміне өрт туралы дабыл 19 маусым күні сағат 22:55-те келіп түскен. Жалынның ауқымына байланысты оқиға орнына құтқарушылар жасағы шақырудың жоғарылатылған дәрежесімен шұғыл аттанды. Өрт сөндірушілердің кәсіби әрекетінің арқасында қызыл жалын сағат 23:03-те толық ауыздықталып, оттың жанармай бекетіндегі өзге де қауіпті нысандарға таралуына жол берілмеді.
Алайда, өртенген көлікті сөндіру барысында оның салонынан үш адамның жансыз денесі табылды. ТЖД өкілдері мерт болғандардың екеуі кәмелетке толмаған жасөспірімдер екенін нақтылады. Сонымен қатар, дене жарақатын алған тағы бір зардап шегуші шұғыл түрде медициналық мекемеге жеткізілді. Оқиғаны өз көзімен көрген куәгерлер өрт басталған сәтте көлік маңында айқайлап, жұрттан көмек сұраған ер адамның жүргенін және машина ішінде адамдардың қалып қоюы мүмкін екенін айтқан болатын. Бұл ақпаратты кейіннен шұғыл қызмет мамандары да ішінара растады.
Тілсіз жауды жоюға Төтенше жағдайлар департаментінің 50-ге жуық маманы мен 10-нан астам арнайы техникасы, сондай-ақ жедел-құтқару жасағы мен Апаттар медицинасы орталығының қызметкерлері жұмылдырылды. Қазіргі уақытта жеңіл көліктің неден тұтанғаны жан-жақты тексеріліп, мамандықтар тарапынан жедел-тергеу амалдары жүргізіліп жатыр.
