Құрылтай отырысында мінберге шығып, туған-туыстары мен жақындарын жеке мақсатта құттықтаған депутаттарға қатысты жауапкершілік қарастырылған. Мұндай әрекет депутаттық әдеп талаптарын бұзу ретінде бағалануы мүмкін, деп жазады Alash.KZ.
Депутат Снежанна Имашеваның айтуынша, Құрылтайдың жаңа Регламентінде депутаттардың мінез-құлқына және отырыс кезіндегі тәртібіне қатысты нақты талаптар белгіленген.
Оның сөзінше, депутаттық мінберді жеке мәселелерге пайдалану, соның ішінде жақындарын көпшілік алдында құттықтау әдеп нормаларына қайшы әрекет ретінде қарастырылуы мүмкін.
Жаңа Регламент депутаттарға қатысты бірнеше тәртіптік шара қолдануға мүмкіндік береді. Олардың қатарында сөгіс жариялау, көпшілік алдында кешірім сұрату, белгілі бір уақытқа сөз сөйлеу құқығынан айыру, отырыс залынан шығару және бір күндік жалақысынан айыру секілді жазалар бар.
Атап айтқанда, тәртіп бұзған депутатқа бір отырыста ғана емес, қажет болған жағдайда бір немесе үш отырыс бойы сөз бермеу шарасы қолданылуы мүмкін. Бұл депутаттың Құрылтай жұмысына қатысуына белгілі бір деңгейде шектеу қояды.
Сонымен қатар ең қатаң шаралардың бірі – депутатты бір күндік жалақысынан айыру. Бұған дейін Құрылтай төрағасының орынбасары Дания Еспаева депутаттардың ай сайынғы жалақысы еңбек өтіліне қарай 600 мың теңгеден 1 миллион теңгеге дейін болатынын айтқан.
Депутаттың нақты қандай жауапкершілікке тартылатыны оның жасаған әрекетінің сипатына байланысты анықталады.
Бұл ретте соңғы шешімді Құрылтай төрағасы қабылдайды. Яғни депутаттың тәртіп бұзғаны анықталған жағдайда оған қолданылатын жаза Регламент талаптарына сәйкес қаралып, тиісті шешім шығарылады.
Құрылтайдағы мұндай талаптардың негізгі мақсаты – депутаттардың мінберді жеке мақсатта пайдаланбауын, отырыс тәртібін сақтауын және депутаттық әдеп нормаларын ұстануын қамтамасыз ету.
