Дауға қалған курьер ана Шымкентке көшіп кетті

Алматыдағы курьер анаға қатысты дау-дамайдан кейін әйел отбасымен бірге Шымкенттегі ата-анасының үйіне көшіп кеткен деп хабарлайды  Alash.kz .

Оқиғадан кейін Еңбек және халықты әлеуметтік қорғау министрлігі оның отбасы туралы кейбір мәліметтерді жариялаған. Соның нәтижесінде қазақстандықтар әйелдің күйеуі IT саласында жұмыс істейтінін, ал ағасы ломбард бизнесімен айналысатынын білді. Сондай-ақ отбасының 2 млн теңге көлемінде несиесі бар екені және олардың «жақсы тұратыны» айтылған.

Журналистер Еңбек вице-министрі Ербол Тұяқбаевтан мұндай ақпаратты жария ету заңды ма деп сұрады.

Вице-министрдің айтуынша, ведомство жеке деректерді жарияламаған, өйткені хабарламада нақты мәліметтер көрсетілмеген.

Алайда кейін әлеуметтік желілерде курьер анаға қатысты сын мен жағымсыз пікірлер көбейген. Осыдан кейін отбасы Алматыдан кетіп, Шымкенттегі ата-анасының үйіне оралған.

Журналистер министрлік болған жағдай үшін кешірім сұрады ма деген сауал қойған. Ербол Тұяқбаевтың сөзінше, министрлік кешірім сұрамаған.

Сонымен қатар ол Еңбек министрлігі отбасыға көмек ұсынғанын, алайда олардың бұл ұсыныстан бас тартқанын айтты. Вице-министрдің сөзінше, әйел қажет болған жағдайда Шымкентте де әлеуметтік көмекке жүгіне алады.