Қуандық Бишімбаевтың туысы — Бақытжан Байжанов амнистияға ілігіп, жазасын мерзімінен бұрын өтеу мүмкіндігіне ие болуы мүмкін. Бұл туралы Tengrinews.kz тілшісіне берген сұхбатында оның адвокаты Ғазиз Ынтықбаев мәлімдеді, деп хабарлайды ALASH.KZ.
Байжанов қазір қайда жазасын өтеп жатыр
Адвокаттың айтуынша, Бақытжан Байжанов жазасын Степногорск қаласындағы орташа қауіпсіздік мекемесінде өтеп жатыр.
Оның ағасы Қуандық Бишімбаев та сол қалада, бірақ №5 мекемеде — ең жоғары қауіпсіздік режимінде отыр.
«Менің білуімше, Бишімбаев та сол қалада, бірақ басқа мекемеде. Оның режимі — максималды қауіпсіздік, ал Байжановтікі — орташа. Бұл екі түрлі мекеме, қалада әр жерде орналасқан», — деді заңгер.
Байжанов шартты түрде мерзімінен бұрын босап шыға ала ма
Ынтықбаевтың айтуынша, оның қорғауындағы азамат 2025 жылдың жазынан бастап шартты түрде мерзімінен бұрын босап шығу (ШМББ) туралы өтініш бере алады.
«Мен онымен әрдайым байланыста бола бермеймін, сондықтан ол өтініш берді ме, нақты білмеймін. Бірақ сот әзірге ондай өтініштерді қараған жоқ», — деді адвокат.
Қорғаушының айтуынша, Байжанов жазаны жеңілдету туралы өтініш те бере алады.
«Ол өтінішті сотқа тікелей емес, мекеме әкімшілігі арқылы береді. Алдымен мекеме әкімшілігі оның мінездемесін, марапаттарын, дипломдарын жинайды. Содан кейін құжаттар Степногорск қалалық сотына жолданады», — деп түсіндірді Ынтықбаев.
Байжанов амнистияға іліне ме
Адвокаттың мәліметінше, Бақытжан Байжанов амнистияға ілінеді. Алайда ол қылмыстық жауапкершіліктен толық босатылмайды.
«Амнистияның екі түрі бар: толық босату және ішінара, яғни жаза мерзімін қысқарту. Байжанов екіншісіне жатады — қалған жазасының үштен бір бөлігін қысқартуы мүмкін, себебі жасаған қылмысы — ауыр санатқа жатады», — деп нақтылады заңгер.
