Атырауда трансвеститтерге қатысты қылмыстық іс қозғалды (видео)

🚨 Атырауда АИТВ-ны қасақана жұқтырды деген күдікпен екі трансвеститтің заңсыз қызметі тоқтатылды, деп хабарлайды Alash.kz

Атырау қаласында 23 және 28 жастағы екі азамат ұсталды. Тергеу мәліметінше, олар 2025 жылдың желтоқсан айынан бастап өздерінде АИТВ инфекциясының бар екенін біле тұра және арнайы медициналық есепте тұрғанына қарамастан, транс тұлғалар ретінде ақылы интимдік қызмет көрсетуді жалғастырған.

Жедел іс-шаралар Атырау облысы полиция департаментінің Ұйымдасқан қылмысқа қарсы күрес басқармасының қызметкерлерімен жүргізілді. Күдіктілер ұсталып, уақытша ұстау изоляторына (УҰИ) қамалды.

Аталған дерек бойынша өзінде АИТВ бар екенін біле тұра, басқа адамға инфекция жұқтыру фактісі бойынша қылмыстық іс қозғалды.

Азаматтардың өмірі мен денсаулығына қасақана қауіп төндіру — ауыр қылмыс. Қазақстан Республикасының заңнамасына сәйкес, мұндай әрекеттер үшін 5 жылдан 10 жылға дейін бас бостандығынан айыру жазасы қарастырылған.

Қазіргі уақытта қажетті тергеу амалдары жүргізіліп жатыр, ықтимал жәбірленушілер анықталуда. Әрбір дерекке құқықтық баға беріліп, кінәлі тұлғалар заң алдында толық жауап береді.