Иран тарапынан Иорданиядағы әскери нысанға жасалған шабуыл салдарынан Америка Құрама Штаттарының екі әскери қызметкері қаза тауып, тағы біреуі хабар-ошарсыз кетті, деп хабарлайды Alash.kz.
АҚШ Орталық қолбасшылығының (CENTCOM) таратқан ақпаратына сәйкес, соққыдан кейін төрт сарбаз шұғыл түрде ауруханаға жеткізілсе, бірнеше әскери қызметкер жеңіл жарақат алған. Ресми Вашингтонның мәліметінше, осы уақытқа дейін Иранмен арадағы қақтығыстар кезінде қаза тапқан америкалық әскерилердің жалпы саны 16 адамға жетіп отыр.
Бұл жолғы шабуыл Иордания аумағында орналасқан әл-Азрак әскери-әуе базасына бағытталған. Айта кету керек, АҚШ қарулы күштері аталған базаны Иранға қарсы әскери операцияларды үйлестіру және жүргізу мақсатында тиімді пайдаланып келген. Болған оқиғаға байланысты АҚШ Президенті Дональд Трамп қаза тапқан сарбаздардың отбасылары мен жақындарына ресми түрде көңіл айтты.
Осы оқиғадан кейін көп ұзамай АҚШ Орталық қолбасшылығы Х әлеуметтік желісіндегі ресми парақшасында мәлімдеме жасап, америкалық әскери құрамалардың Иран аумағына жауап ретінде жаңа әуе соққыларын беруді бастап кеткенін хабарлады.
