Халық арасында бұрынғы Астана қаласының әкімі ретінде есімі жақсы таныс Алтай Көлгінов Қазақстанның Эстониядағы төтенше және өкілетті елшісі есебіндегі қызметіне кірісті, деп хабарлайды Alash.KZ ұлттық порталы.
"Мемлекет басшысының жарлығымен Алтай Сейдірұлы Көлгінов Қазақстан Республикасының Эстония Республикасындағы төтенше және өкілетті елшісі лауазымына тағайындалды", - делінген Ақорда хабарламасында.
Бұған дейін бұл қызметті Нұрлан Сейтімов атқарған болатын, ол лауазымынан босатылды. Сонымен қатар:
"Қазақстан Республикасының Эстония Республикасындағы Елшісі Алтай Көлгінов Эстония президенті Алар Кариске сенім грамоталарын тапсырды. Әңгіме соңында Эстония президенті Қазақстан Елшісін ресми қызметке кірісуімен құттықтап, қазақ-эстон қарым–қатынасын одан әрі нығайтуда зор табыс тіледі", - делінген хабарламада.
Орайы келгенде айта кетейік, Алтай Көлгінов 1978 жылы 15 қаңтарда Оңтүстік Қазақстан облысының Сарыағаш ауданында дүниеге келген.
Қазақ, орыс және ағылшын тілдерін меңгерген. ҚР президенті жанындағы мемлекеттік басқару академиясын бітірген. Ұлыбританияның Абердин университетінің түлегі. Алтай Көлгінов "Болашақ" бағдарламасы бойынша оқуға түсіп, "халықаралық коммерциялық құқық" магистрі дәрежесін алған.
