2026 жылдың басынан бері Алматыда 4600-ге жуық неке тіркелді. Статистиканың егжей-тегжейін "Азаматтарға арналған үкімет" мемлекеттік корпорациясы хабарлады, - деп жазады Alash.KZ сайты Tengri Lifeқа сілтеме беріп.
Олардың мәліметінше, мегаполисте күн сайын орта есеппен 70-ке жуық неке қию рәсімі өтеді. Некеге тұрушылардың орташа жасы - қалыңдықтарда 29 жас, ал күйеу жігіттерде 32 жас болады.
"Неке қиюға өтініш берген ең егде адам - 92 жастағы ер адам. Ал заңнама талаптарына сәйкес рұқсат алған ең жас жұп 16 жасында отбасын құрды", - деп хабарлады корпорация өкілдері.
Сондай-ақ осы кезең ішінде 409 жұп шетелдік азаматтармен некесін тіркеген.
Бұдан бөлек, 2026 жылдың басынан бері 934-ке жуық жұп некені бұзу туралы өтініш берген. Ажырасуға өтініш бергендердің орташа жасы: ерлер арасында - 39 жас, әйелдер арасында - 37 жас.
