Украина президенті Владимир Зеленский Ресейге азаматтық инфрақұрылымға бағытталған алыс қашықтықтағы дрондар мен зымырандық соққылардан бас тартуды 30 күнге, әрі қарай ұзарту мүмкіндігімен ұсынды. Бұл туралы ол 20 сәуір кешке өзінің Telegram-арнасында жазды, деп хабарлайды ALASH.KZ.
Зеленскийдің айтуынша, Украина Қарулы Күштерінің бас қолбасшысы Александр Сырскийдің соңғы есебіне сәйкес, тәуліктің басынан бастап Ресей әскері Пасха қарсаңындағы тыныштықты екі мыңнан астам рет бұзған.
— Біздің позицияларымызға қарсы 67 рет ресейлік шабуыл жасалды, олардың ең көбі — Покровск бағытында. 1355 рет оқ атылды, оның ішінде 713-і — ауыр қару, 673 — FPV-дрондарды қолдану, — деді Зеленский.
— Фронттың барлық негізгі бағыттарында Ресей өзі уәде еткен тыныштықты сақтамады. Пасхадан бастап толық тыныштық орнату туралы украин ұсынысына Ресей толық бір күннің ішінде де жауап бере алмады, — деп қосты ол.
Сонымен қатар, Зеленский жексенбі күні Украинада әуе дабылы болмағанын айтты.
— Бұл — қол жеткізілген және жалғастыруға ең оңай тыныштық форматы. Украина азаматтық инфрақұрылымға бағытталған алыс қашықтықтағы дрондар мен зымырандық соққылардан бас тартуды, кемінде 30 күнге, әрі қарай ұзарту мүмкіндігімен ұсынып отыр.
Егер Ресей мұндай қадамға келіспесе, бұл оның тек адам өмірін қирататын және соғысты жалғастыруға мүдделі екенін дәлелдейді, — деп жазды Украина президенті.
