Әлеуметтік желіде Argonya есімімен танылған әнші Арғын Аусаров Қайрат Нұртастың Астанадағы шығармашылық кешінде сахнаға мас күйде шыққаны туралы сынға жауап берді. Өнер иесі сол күні өзін жайсыз сезінгенін айтып, концерт кезіндегі жағдайға түсініктеме берді, деп жазады Alash.kz
Әншінің айтуынша, концертке денсаулығы сыр беріп барған. Дене қызуы көтеріліп, өзін нашар сезінгеніне қарамастан, сахнаға шығуға тура келген. Арғын Аусаров ішімдік ішкенін де жасырмады. Оның сөзінше, әртістер арасында аздап ішіп, бойға күш жинауға тырысатын жағдайлар кездеседі.
«Сол концертке қатты ауырып бардым. Қызуым көтеріліп, жаман ауырдым. Сөздің ашығы, өтірік айтпай-ақ қояйын, барлық әртіс біледі, менің “Давай, 50-100 грамм басып жіберейікші, дух жинап алайық” дегенім болды. Ол жерде қатты мас болып, тентіректеп жүрген жоқпыз. Жанды дауыста айтып тұрмыз. Сол сәтте басым дыңылдап, құлағым бітеліп қалды. Билеуге де тырысқанмен, денсаулығым болмады. Іштей шаршап тұрмын. Менің ойымша, жақсы өнер көрсеттік. Жаман пікір айтатындар әрдайым табылады», – деді әнші.
Argonya сол күні сахнада өзін еркін сезіне алмағанын, басы ауырып, құлағы бітеліп қалғанын жеткізді. Би қимылдарын жасауға да денсаулығы мүмкіндік бермеген. Соған қарамастан, ол өнер көрсетуін сәтсіз болды деп есептемейді.
Әнші өзіне айтылған жағымсыз пікірлерге де тоқталып, жұрттың сынына түсіністікпен қарауға шақырды. Оның пікірінше, көпшілік алдында өнер көрсететін адамға сын айтатындар әрдайым табылады.
Ал Қайрат Нұртастың анасы Гүлзира Айдарбекова жағдайға басқаша баға берді. Ол Argonya-ны түсінуге болатынын айтып, әншінің әрекетін тым қатты сынға алудың қажеті жоқ екенін аңғартты.
Айдарбекованың сөзінше, Арғын Аусаров концертке дайындалуға жеткілікті уақыт таппаған. Ол сол күні ұшып келіп, сахнаға шыққан. Гүлзира Айдарбекова әншінің сахнадағы кейбір қимылдары мен дауысының өзгеруін де осы жағдайлармен байланыстырып, оны жақтап сөйледі.
Алайда әлеуметтік желі қолданушыларының бір бөлігі мұндай түсініктемелерге келіспеді. Олар әншінің денсаулығы сыр берген жағдайда сахнаға шығу мәселесіне жауапкершілікпен қарауы керектігін айтып, ішімдік ішкен күйде өнер көрсетуін сынға алды.
Осылайша, Argonya-ның концерттегі әрекеті желіде қызу талқыға түсті. Бір тарап әншінің жағдайын түсінуге тырысса, екінші тарап көрермен алдындағы жауапкершілік бірінші орында тұруы керек деген пікірде.
