Қарағанды облысының полицейлері халықаралық іздеуде жүрген 43 жастағы қылмыскерді құрықтады, деп жазады Alash.kz.
Күдікті бес жыл бойы заң орындарынан бой тасалап, арнайы жабдықталған жасырын орында тығылып келген. Жедел-іздестіру шаралары барысында оның қала аумағындағы жеке үйлердің бірінде жасырынып жатқаны анықталды. Қазіргі уақытта ұсталған азамат қамауға алынып, тергеу амалдары қайта жанданды.
Тергеу мәліметтеріне сәйкес, бұл азамат аса ірі көлемде қаражат бопсалады деген күдікке ілінген. Ол қала тұрғынына қоқан-лоқы көрсету арқылы 117 миллион теңге талап еткені туралы деректер бар. Қылмыс жасалғаннан кейін күдікті қатаң конспирациялық шараларды қолданып, бес жыл бойы құқық қорғау органдарына ұстатпай келген.
Полиция қызметкерлері арнайы операция кезінде үй ішінен шеберлікпен жасырылған тайникті тауып, іздеудегі адамды сол жерден шығарып алды. Бұл жасырын орын сырт көзге мүлдем байқалмайтындай етіп жасалған. Қазіргі таңда күдікті уақытша ұстау изоляторына тоғытылып, оның басқа да қылмыстарға қатыстылығы тексеріліп жатыр.
Аталған факті бойынша сотқа дейінгі тергеп-тексеру жұмыстары жалғасуда. Қылмыстық кодекстің тиісті баптары бойынша айып тағылып, іс материалдары жинақталуда. Бес жылға созылған іздеу шараларының нәтижесінде заң үстемдігі қамтамасыз етіліп, күдікті тиісті жазасын алу үшін сот алдында жауап беретін болады.
