Қазақстанда жақын арада бірқатар азаматтардың табысы едәуір артып, медициналық инфрақұрылым жаңартылмақ. Үкімет отырысында Премьер-министр Олжас Бектенов елімізде кімдердің жалақысы өсетінін хабарлап, салаға қатысты маңызды міндеттерді жүктеді, деп хабарлайды Alash.kz.
Жиын барысында Үкімет басшысы Денсаулық сақтау министрлігіне әкімдіктермен бірлесіп, 70 денсаулық сақтау нысанының, соның ішінде 8 перинаталдық орталық пен 9 көпбейінді балалар ауруханасының құрылысын белгіленген мерзімде аяқтап, пайдалануға беруді жүктеді. Сонымен қатар Ұлттық балаларды оңалту орталығының жаңа үлгідегі өңіраралық филиалдарын салу мәселесін пысықтау қажеттігі ескертілді. Алғашқы медициналық-санитариялық көмек жүйесін дерттің алдын алу мен оны ерте анықтау бағытына басымдық бере отырып жаңғырту да басты назарға алынды.
Осы орайда Премьер-министр сала мамандарының құзыретін арттыру және оларды қаржылай қолдау туралы тапсырма беріп, өзінің төл сөзінің бірінші бөлігінде былай деді:
— Жалпы практика дәрігерлерінің клиникалық шешім қабылдау және диагностикалық зерттеулерді өз бетінше тағайындау жөніндегі өкілеттіктерін кеңейту қажет, — деп атап өтті Үкімет басшысы.
Атқарылатын ауқымды жұмыстармен қатар медиктердің еңбекақысын өсіру мәселесі де нақтыланды. Олжас Бектенов Денсаулық сақтау министрлігіне 2027 жылдан бастап медицина қызметкерлерінің жалақысын көтеруге арналған шығындарды үш жылдық бюджет жобасында қарастыруды жүктеді. Министрліктерге берілген бұл тапсырманың екінші бөлігінде ол:
— Денсаулық сақтау және Қаржы министрліктеріне келесі жылдың 1 қаңтарынан бастап учаскелік дәрігерлер мен медицина қызметкерлерінің жалақысын 40%-ға дейін көтеруге арналған шығындарды үш жылдық бюджет жобасында қарастыруды тапсырамын, — деп кесіп айтты.
Еске сала кетсек, кеше Президент Қасым-Жомарт Тоқаев Қазақстан халқына Жолдауында Үкіметке ең төменгі жалақы мөлшерін 85 мың теңгеден 110 мың теңгеге дейін көтеруді тапсырған болатын. Мемлекет басшысы аталған тапсырманың 2027 жылдың 1 қаңтарынан бастап толық іске асуы тиістігін айтты.
