Алматы облысындағы Северцов мұздығынан туристер кездейсоқ тауып алған адам сүйектері қоғамды шошытты. Бұл сүйек қалдықтары осыдан 19 жыл бұрын тауға кетіп, қайта оралмаған отандасымызға тиесілі болып шықты, деп жазады Alash.KZ
Бұл суық хабарды естіген туыстарының қабырғасы қайысып отыр. Марқұмның қызы Нелли Михееваның айтуынша, олар бұл олжа туралы желідегі суреттерден білген. Жантүршігерлік фотоларды қарап отырып, Нелли әкесінің 2007 жылы тауға шыққанда арқалап кеткен ескі рюкзагын бірден таныған. Бауыр еті баланың жүрегі сезген қасіретті кейін Төтенше жағдайлар министрлігі де растады.
Құтқарушылар мұз астынан шыққан рюкзактың ішінен жоғалған азаматтың атына жазылған жеке куәлікті тапқан. Осылайша, бір отбасы 19 жыл бойы «тірі ме екен» деген үмітпен өмір сүріп, ақыры қайғылы шындықпен бетпе-бет келді. Қазіргі уақытта табылған сүйектерге сараптама жасалып жатыр, бірақ жақындары үшін бұл — үлкен қасірет.
