Аустралияның Перт қаласындағы сот мәліметінше, ата-анасы 17 жастағы қызын бала секілді ұстау үшін оның тамағын, білім алуын және әлеуметтік байланыстарын әдейі шектеген. Олар қызын «балерина-ханшайым» деп атап, оның өсуін қаламаған, деп хабарлайды Alash.kz.
Қызды мектепке жібермей, үйде оқытқан, осылайша оны қатарластарынан оқшаулап ұстаған. Жалғыз ерекшелік – балет сабақтары болған, онда мұғалімдер оның шамадан тыс арықтығын және балаша әрекет ететінін байқаған. Әкесі тіпті қыздың шынайы жасын жасыру үшін құжаттарды қолдан жасаған.
17 жасында бойжеткеннің салмағы бар болғаны 27 килограмм болған, ал ата-анасы оның рационын барынша шектеуге тырысқан. Қыздың психологиялық дамуын да әдейі тежеген: ол жасөспірім болғанына қарамастан, тек балаларға арналған мультфильмдер көрген, ал туған күнінде оған Барби қуыршақтарын сыйлаған.
Тек оның ауыр дәрежедегі таусылуынан кейін ауруханаға түсуі жағдайды өзгертті. Балет мектебінің оқытушылары әлеуметтік қызметтерге хабар бергеннен кейін, сот ата-анасының қызын тәуелді күйде ұстауға бар күшін салғанын анықтады.
Қыз соттан ата-анасын ақтауды сұрап, оларсыз қалай өмір сүретінін білмейтінін айтқанымен, сот шешімі бойынша әкесі 6,5 жылға, ал анасы 5 жылға бас бостандығынан айырылды.
Қазіргі уақытта бұрынғы балерина денсаулығын қалпына келтіріп, салмақ жинап жатыр.
