Өзбекстанда блогер ерте некенің артықшылықтарын көрсетпек болған бейнеролигі үшін айыппұл төледі, деп хабарлайды Alash.kz.
Бейнероликте жас отбасы бейнеленген: жасы 15 және 17-дегі ерлі-зайыптылар екі баланың ата-анасы ретінде көрсетілген.
Кейіннен бұл тек қойылым екені анықталды, бірақ блогер бұл кадрларды қыздардың ерте жаста бала тууы керек деген идеяны насихаттау үшін пайдаланған.
Ролик қоғамда үлкен резонанс пен наразылық туғызып, оның авторларын жауапқа тартуға себеп болды.
Балалар омбудсмені мұндай насихаттың жол берілмейтінін мәлімдеді. Бұл іс бойынша материалдар блогердің әрекетіне құқықтық баға беру үшін Термез қалалық сотына жіберілді.
Сот блогерді заңнаманы бұзды деп танып, оның әрекетін Әкімшілік жауапкершілік туралы кодекстің 202-2-бабының 1-бөлігі бойынша (жалған ақпарат тарату) саралады. Нәтижесінде, блогерге 1,5 миллион сом (шамамен 58 мың теңге) көлемінде айыппұл салынды.
Бейнероликке қатысқан екі адамға мұндай әрекеттерді қайталамау туралы ресми ескерту жасалды.
Еске сала кетейік, 2019 жылдан бастап Өзбекстанда ерлер мен әйелдер үшін неке жасының төменгі шегі 18 жас болып белгіленген.
Бұл норманы бұзу, әсіресе оны насихаттау, заңды өрескел бұзушылық болып саналады.
