Өңір тұрғындарын қауіптерден сақтандыру әрі ақпараттандыру іс-шаралары Шығыс Қазақстан облысында да жүйелі түрде жүргізілуде. Шығыс Қазақстан облысының Өңірлік коммуникациялар қызметінің алаңында Шығыс Қазақстан облысының Төтенше жағдайлар департаменті (ТЖД) бастығының орынбасары Серік Амангелдин пешпен жылытылатын жеке тұрғын үй секторында тұратын халықтың әлеуметтік осал топтары арасында ауқымды профилактикалық жұмыстың басталғаны туралы хабарлады. Барлығы 3 101 үй есепке алынған. Тексеру нәтижесінде өрт қауіпсіздігі талаптарының 1 384 бұзылуы, атап айтқанда, оның 617-сі пешпен жылыту жүйелерінде, 540-ы электр желілері мен электр жабдықтарын пайдалануда, сондай-ақ 227-сі өзге сипаттағы бұзушылықтар анықталды. Барлық үй иелеріне анықталған кемшіліктерді жою бойынша нұсқаулар берілген. Өрт қауіпсіздігі айлығы аясында ШҚО ТЖД аумақтық бөлімшелері мұқтаж тұрғындарға түтін мұржаларын күйеден тазартуға, пештердегі жарықтар мен саңылауларды жоюға, сондай-ақ пеш жабдықтарының алдына қорғаныс тақталарын орнатуға көмек көрсетеді. Бүгінгі таңда 2 406 үйде көміртегі тотығы датчиктері орнатылған. Жүргізіліп жатқан шаралардың арқасында тұрғын үй секторында өрттен болатын өлім-жітім 22% - ға төмендеп, 17 адамды құрады. Ағымдағы жылдың басынан бері көміртегі тотығымен уланудан 22 адам зардап шекті.
Алматы облысының Төтенше жағдайлар департаменті де жылыту маусымы басталар алдында жүргізілетін ауқымды шарадан тысқары емес. Халықтың қауіпсіздігін қамтамасыз етуге бағытталған кең ауқымды профилактикалық жұмыстар жүргізілуде. Өрт және көміртегі тотығымен улану қаупі ерекше жоғары халықтың әлеуметтік осал топтарындағы отбасыларға ерекше назар аударылады.
Акция аясында ТЖД мамандары көпбалалы және аз қамтылған отбасыларға, сондай-ақ өмірлік қиын жағдайға тап болған азаматтарға назар аудара отырып, тұрғын үйлерді аралауды жүзеге асырады. Сапар барысында қызметкерлер тұрғындарға жылу құрылғылары мен тұрмыстық техниканы қауіпсіз пайдалану ережелерін түсіндіре отырып, өрт қауіпсіздігі бойынша нұсқаулықтар өткізеді. Тәуекелдерді азайтуға көмектесетін негізгі ережелері бар жадынамалар да таратылады.
Облыстық ТЖД қызметкерлері профилактикалық іс-шаралардың жүйелілігіне қарамастан, өрт қауіпсіздігі ережелерін сақтамау мәселесі өткір күйінде қалып отырғанын атап өтті. Өкінішке орай, көптеген азаматтар қарапайым, бірақ маңызды сақтық шараларын елемейді, бұл оларға және айналасындағыларға ауыр зардаптарға әкелуі мүмкін.
ТЖД жылыту маусымында балаларды қараусыз қалдырмау, төсекте шылым шекпеу, тек жарамды электр құрылғыларын пайдалану және оларды пайдалану жөніндегі нұсқауларды қатаң сақтау өте маңызды екенін еске салады. Осы ережелерді сақтау өмірді сақтап, қайғылы жағдайлардың алдын алады.
Өрт немесе басқа төтенше жағдай туындаған кезде дереу "101" немесе "112" телефондарына қоңырау шалу ұсынылады. Жедел хабар алмасу және төтенше жағдайда дұрыс әрекет ету ауыр зардаптардың алдын алуға және өмірді сақтауға қабілетті.
