Сербияда қаза тапқан қазақстандық бойжеткеннің ісі бойынша куәгер өз нұсқасын баяндады, деп хабарлайды Alash.kz.
19 жастағы Амира Қанат көз жұмар алдында үйінде тұрған Влад есімді жігіт арнайы бейнеүндеу жариялап, қайғылы оқиғаға қатысы жоғын айтты. Оның сөзінше, оқиға болған күні бойжеткен анасымен сөйлесу үшін одан пәтерден шыға тұруын өтінген. Қайта оралған кезде ол Амираның балкон шарбағынан асып түсіп, төмен құлағанын көргенін алға тартады. Жігіт сол сәтте бірден шұғыл қызметтерді шақырғанын жеткізді.
Бұдан бөлек, Влад бойжеткеннің ауыр эмоционалды жағдайда болғанын дәлелдемек болып, оның жеке күнделігінің беттерін желіде жариялап жіберді. Алайда мұндай жеке жазбаларды көпшілікке тарату әлеуметтік желі қолданушыларының үлкен наразылығын тудырды.
Амираның жақындары суицид туралы бұл нұсқаға сенбейді және істің толық әрі ашық тергелуін талап етіп отыр.
Бұған дейін Қазақстан СІМ бойжеткеннің қаза тапқанын растаған болатын. Қазіргі уақытта Сербияда аталған факті бойынша тергеу амалдары жалғасуда, ал отандасымыздың дипломаттары марқұмның отбасына консулдық көмек көрсетіп жатыр.
