Елорданың Дін істері жөніндегі басқармасы бұған дейін ресми тіркеусіз уағыз айтқаны үшін жауапқа тартылған Дарын Мубаров пен журналист Айнұр Асанбердінің арасындағы бейнесұхбатқа қатысты тексеріс бастады деп жазады Alash.KZ
Желіге мониторинг жүргізу барысында ведомство мамандары YouTube платформасындағы Айнұр Асанбердінің жеке арнасынан «Сізге уағыз айтуға тыйым салынды. Енді не істейсіз?» деген тақырыппен шыққан подкастын анықтаған. Бұл бейнематериал үстіміздегі жылдың 31 шілдесінде жарық көрген еді.
Мемлекеттік мекеменің мәліметінше, аталған сұхбат Дарын Мубаровқа қатысты бұған дейін жасалған ресми ескертулер мен хабарламаларға қарамастан, әлеуметтік желілерде ашық жарияланған.
«Аталған подкаст Қазақстан аумағында тиісті тіркеуден өтпей, діни-миссионерлік әрекеттермен айналысқан Дарын Мубаровтың қатысуымен түсірілген. Астана қаласының Дін істері жөніндегі басқармасы тарапынан алдын ала ескерту жасалғанына қарамастан, бұл контент интернетте жарияланды. Қазіргі уақытта материалдың заңдылығына құқықтық баға берілуде. Егер тексеріс нәтижесінде діни қызмет туралы заңнаманы бұзу фактілері расталса, қолданыстағы заң талаптарына сай тиісті шаралар қабылданады», — делінген басқарма таратқан ресми мәлімдемеде.
Айта кетейік, осы жылдың көктем айларында Дарын Мубаров діни сипаттағы материалдарды заңсыз таратқаны үшін кінәлі деп танылып, оған 865 мың теңге көлемінде әкімшілік айыппұл салынған еді. Ресми органдардың дерегі бойынша, бұл оның заңнаманы бірінші рет бұзуы емес, бұған дейін де ол осындай құқық бұзушылықтары үшін жауапкершілікке тартылған.
