Ақтөбе облыстық сотының кассациялық сатысы кісі өлтіріп, қарақшылық жасағаны үшін 22 жылға сотталған жергілікті тұрғынның шағымын қарап, бастапқы үкімді күшінде қалдырды, деп жазады Alash.kz.
Оқиға 2024 жылдың маусым айында орын алған. Қылмыскер Toyota Camry автокөлігін сатып алушы ретінде кейіп танытып, жәбірленушіні оқшау жерге алдап апарып, аса қатыгездікпен өмірін қиған. Сотталушы тараптың тергеудегі заң бұзушылықтар туралы уәждеріне қарамастан, сот оның кінәсі толық дәлелденді деп тапты.
Қылмыстың мән-жайы бойынша, 9 маусымда сотталушы көлік сатып аламын деген желеумен әйел адаммен кездескен. Ол жәбірленушіні адам аяғы баспайтын жерге апарып, қауіпсіздік белдігімен буындырып өлтірген. Қылмыскер мәйіттің кім екенін танытпау мақсатында марқұмның бет-әлпетін пышақпен тілгілеп, алтын алқасын иемденген. Содан соң денені бұталар арасына жасырып, ұрланған көлікпен оқиға орнынан тайып тұрған.
Тергеу барысында жиналған бұлтартпас айғақтар қылмыскердің әрекетін толық әшкереледі. Атап айтқанда, бейнебақылау камераларындағы жазбалар, жәбірленушінің шабуыл кезінде «112» қызметіне хабарласуға үлгерген дауыс жазбасы және оқиға орнындағы ДНҚ сараптамасының нәтижелері негізге алынды. Сондай-ақ ұсталған кезде оның иелігінен марқұмның жеке заттары мен айдап кеткен автокөлігі табылған.
Қорғау тарабы кассациялық шағым түсіріп, полиция тарапынан қысым болғанын және іске басқа да адамдардың қатысы бар екенін алға тартқанымен, сот бұл мәлімдемелерді негізсіз деп таныды. Кассациялық саты іс материалдарын қайта зерделеп, бастапқы сот үкімінің заңды әрі әділ екенін растады. Осылайша, сотталған азамат алдағы 22 жылын қатаң режимдегі колонияда өткізетін болады.
