2026 жылдың 2 наурызынан бастап «Отбасы банк» тұрғын үй жағдайын жақсарту үшін біржолғы зейнетақы төлемдерін пайдалануға арналған сервистерін қайта іске қосады, деп хабарлайды Alash.kz.
Қашықтан қызмет көрсету жүйелеріндегі техникалық жұмыстар аяқталғаннан кейін, салымшыларға жинақтарын несие қарызын жабуға бағыттау мүмкіндігі қайта берілмек. Дегенмен, жаңа ережелерге сәйкес, бұл қаражатты пайдалану тәртібіне айтарлықтай өзгерістер енгізілді.
Ендігі кезекте зейнетақы жинағының артық бөлігі тек ипотеканың негізгі борышын өтеуге ғана жұмсалады. Ережедегі «берешек» термині «негізгі борыш» болып өзгертілгендіктен, мемлекеттік қаражат есебінен несиенің пайыздары мен өсімпұлдарын жабуға тыйым салынады. Бұл заңды күшіне енген жаңа талаптардың негізгі шарты болып табылады.
Қарызды өтеу процесі екі кезеңнен тұратын болады. Алдымен қарыз алушы өз қаражаты есебінен банк алдындағы пайыздар бойынша қарызын толық жабуы тиіс. Содан кейін ғана зейнетақы шотындағы қаражат негізгі қарыз сомасын азайтуға бағытталады. Бұл амалдарды орындау үшін клиенттің банктегі шотында қажетті мөлшерде жеке қаржысы болуы шарт.
Тұрғын үй жағдайын жақсартуға бағытталған барлық өтінімдер бұрынғыша enpf-otbasy.kz электронды платформасы арқылы қабылданады. Порталдың жұмысы мен жаңа тетіктер туралы қосымша ақпаратты банктің ресми ресурстарынан білуге болады.
