Қазақстанда қайтыс болған адамдарды жерлеуге арналған біржолғы мемлекеттік төлемді тағайындаудың жаңа ережелері бекітілді, деп хабарлайды Alash.kz.
Үкімет қабылдаған тиісті қаулыға сәйкес, 2027 жылғы 1 қаңтардан бастап бұл қаржылық көмектің мөлшері мен оны тағайындау фактісі марқұмның отбасының әлеуметтік әл-ауқат деңгейіне тікелей тәуелді болады.
Жаңа тәртіп бойынша, республикалық бюджеттен төленетін біржолғы жәрдемақы жасы бойынша зейнетақы, мемлекеттік базалық зейнетақы төлемі немесе мемлекеттік әлеуметтік жәрдемақы алушылар қайтыс болған жағдайда беріледі. Қаражатты алу құқығы марқұмның отбасы мүшелеріне немесе жерлеу рәсімін өз есебінен ұйымдастырған азаматқа беріледі.
Жәрдемақының негізгі мөлшері 35 АЕК етіп белгіленген. Ал Ұлы Отан соғысы ардагерлерінің отбасылары үшін бұл көрсеткіш 36,6 АЕК-ті құрайды. 2027–2029 жылдарға арналған республикалық бюджет жобасында АЕК мөлшері 4 693 теңге көлемінде қарастырылған. Осы көрсеткіш бекітілген жағдайда, жерлеу жәрдемақысы 164 255 теңгені, ал ҰОС ардагерлері үшін 171 763,8 теңгені құрамақ. Салыстыру үшін айтсақ, 2026 жылы 4 325 теңгелік АЕК мөлшері кезінде бұл төлем 151 375 теңгені құраған болатын.
Алдыдағы өзгерістердің басты жаңашылдығы — төлемнің бұрынғыдай сөзсіз берілмейтіндігі. Егер марқұмның отбасы немесе өтініш беруші әл-ауқат деңгейінің жоғары («А» деңгейі) немесе ауқатты («В» деңгейі) санаттарына жатқызылса, жәрдемақы беруден бас тартылады.
Қаражатты алу үшін өтініш беруші мен отбасының барлық кәмелетке толған мүшелері өздерінің дербес деректеріне, атап айтқанда банктік және заңмен қорғалатын өзге де құпия мәліметтерге, сондай-ақ несиелік бюро деректеріне (несиелердің болуы, мерзімі өткен берешектер сомасы, ай сайынғы төлем көлемі және қарыз қалдығы) қол жеткізуге ресми түрде келісім беруі шарт.
Аталған қаржылық-мүліктік көрсеткіштер негізінде Отбасының цифрлық картасы отбасының әл-ауқат деңгейін автоматты түрде анықтап, 35 АЕК көлеміндегі төлемді тағайындау немесе бас тарту туралы шешім қабылдайтын болады.
