Танымал әнші Серік Ибрагимов отандық подкастардың бірінде қонақта болып, кино саласындағы алғашқы продюсерлік қадамы, қаржылық тәуекелдері мен қиын-қыстау сәтте өзінен теріс айналған өнердегі әріптестері туралы ағынан жарылды, деп хабарлайды Alash.kz.
Өнер иесі продюсерлік жолын «Заманback» туындысымен бастап, бастапқыда қолында бары-жоғы 1 миллион теңге ғана болғанын жасырмады. Кино түсіруге бекінген шақта жан-жағындағы жақындары мен достары оның бұл бастамасына күмәнмен қарап, аяқтан шалуға тырысқан. Сол бір ауыр кезеңді еске алған ол өзінің ресми төл сөзінде былай деп ащы шындықты жайып салды:
«Барлығы келеді де “Не істеп жатсың, қадаласың” деді. “Мен жігітпін, тәуекел етіп көрейін, қолдамайсыңдар ма? Нәтижесін күтсеңдерші” дегем. Мен 1 миллион теңгемен бастадым. Әркімнен қарыз сұрадым. Сөйтім ақша жинап, 140 миллионға кино түсірдім. Бірақ, көп досым қолдаған жоқ. Қолдағандар саусақпен санарлықтай. Сол кезде мен бәріне ренжіп қалғанмын. “Мен әншімін ғой, 1 тойға кіріп тауып беремін, 500 мың, 200 мың теңге берші” деп сұрасам да бермеген», — деп өкпесін білдірді Серік Ибрагимов.
Сонымен қатар, әнші тығырыққа тірелген сәтте өзіне қол ұшын созып, сенім артқан саусақпен санарлық жандардың есімін де ерекше атап өтті. Атап айтқанда, жары мен жақындарынан бөлек, қазақ эстрадасының ардақтысы Мейрамбек Беспаев та жас продюсердің бұл батыл қадамын қуаттап, моральдық қолдау білдірген.
Бұған қоса, Серік Ибрагимов кино өндірісіне білек сыбана кіріспес бұрын отбасында үлкен шешім қабылдағандарын да жасырмады. Бастапқыда фильм бюджеті 80 миллион теңге шамасында болады деп жоспарланғанымен, тәуекелге бел байлаған әнші жарымен өзара келісімге келген. Ол жоба сәтсіз аяқталып, шығынға батқан жағдайда өз үйлерін сату арқылы қарыздардан құтылуды ұсынған.
