Жұмбақ жағдайда қаза тапқан Алтынбек Сәрсенбаевтың ағасы Рысбек Сәрсенбаев «Уақыт көрсетеді» бағдарламасына сұхбат беріп, елдегі ахуал және інісінің қазасы туралы бірқатар сұрақтарға кеңінен жауап берді. Сұхбат барысында ол «жылдағы дәстүр» бойынша Мақпал Жүнісованың шақыруымен Заманбек Нұрқаділовтың шаңырағында болған кезде экс-президент Нұрсұлтан Назарбаевтың інісі Болат Назарбаевпен дастархандас болғаны туралы айтып берді.
– Біз кездескенде жанында соңғысы ма, әлде соңғысының алдындағы ма, тоқалдарының бірімен отырды. Бір-біріне анекдот айтып отырды. Анекдот айтатын жер емес қой. Кетіп те қалғым келді, бір дастарханда отыру жиіркенішті болды. Мақпал да, қасымдағы жігіттер де «дастарханнан үлкен емессің» деп жібермеді. Сосын «Болат қазақта «өз аяғыңмен келді ме, Құдай айдап келді ме» деген сөз бар. Енді мені мұқият тыңда! Жақсылап ұғып ал да, ана Нұрсұлтан ағаңа жеткізіп бар. Түрі бұзыла бастады. Содан мен Зәкеңнің мемлекетке, қазаққа, Алматыға сіңірген еңбегі туралы айттым. Және осындай азаматқа «өз-өзін үш рет атып өлтірді» деп жала жапты. Осыны айтқызып отырған сенің ағаң ғой. Өтірігін доғарсын, Зәкең тірі болса өз намысын өзі қорғар еді. Өзі жоқ, оның намысын біз қорғаймыз. Ағаңа айт, қылмыстық іс қозғап, қылмысты ашсын, бәрі үшін өзі жауапты. Осыны жеткізіп бар, – дедім.
Рысбек Сәрсенбай Назарбаевпен жолыға қалса, осындай сұрақтарды өзіне тікелей қоятынын да жеткізді. Бұл сұрақтарды Ішкі істер экс-министрі Бауыржан Мұхаметжановқа да қойғанын жасырмады.
https://www.youtube.com/watch?v=2XT_uTC3zQk
