Түркістан қаласында әйел адамды күштеп ұрлап әкетіп, психиатриялық мекемеге заңсыз жатқызған тұлғаларға қатысты сот үкімі шықты, деп хабарлайды Alash.kz.
Ауданаралық сот істің барлық мән-жайын қарап, айыпталушыларды кінәлі деп таныды. Тергеу барысында анықталғандай, үш ер адам жәбірленушінің еркіне қарсы қол-аяғын скотчпен байлап, Түркістаннан Шымкент қаласына мәжбүрлі түрде жеткізген. Содан кейін жәбірленушінің жұбайы медициналық құжаттарды толтырып, әйелін Облыстық психикалық денсаулық орталығына заңсыз орналастырған. Бұған қоса, құқық қорғау органдары ер адамның тұрғылықты жерінен атыс қаруына арналған 16 жауынгерлік патрон тапқан.
Сот шешімімен жәбірленушінің күйеуі адам ұрлау, психиатриялық стационарға заңсыз орналастыру және оқ-дәрілерді заңсыз сақтау баптары бойынша кінәлі деп танылып, 9 жылға бас бостандығынан айырылды. Оның қылмысқа қатысқан екі сыбайласына 8 жыл мерзімге бас бостандығынан айыру жазасы кесілді.
Материалдық өтемақы мәселесі бойынша сот негізгі айыпталушыдан жәбірленушінің пайдасына 5 миллион теңге, ал оның көмекшілерінің әрқайсысынан 3 миллион теңге көлемінде моральдық зиян өндіру туралы шешім шығарды.
