Ақмола облысының Есіл ауданында 38 жастағы аудандық аурухана терапевті оқыстан көз жұмды, деп хабарлайды Alash.kz.
Жергілікті басылымдар мен желіде таралған деректерге сүйенсек, марқұм жақында ғана демалыстан оралып, еңбек жолын жалғастырған еді. Алайда, қайғылы оқиғаның алдында ол Көкшетау қаласына барып, қылмыстық іс бойынша куәгер ретінде жауап беріп қайтқан. Осы тергеу барысында құқық қорғаушылар оның ұялы телефонын тәркілеген екен.
Дәрігер әйел белгіленген уақытта жұмысқа шықпаған соң, әріптестері оны іздеуге кіріседі. Өкінішке қарай, оның денесі Есіл қаласындағы өз үйінен табылды. БАҚ өкілдерінің хабарлауынша, оқиға орнынан марқұмның анасына қалдырған қоштасу хаты шыққан.
Онда: «Сізді сағынатын боламын», — деген соңғы сөздері жазылған.
Бұл жағдайға қатысты Экономикалық тергеу департаменті әзірге ешқандай түсініктеме бермей отыр. Ал полиция өкілдері өзін-өзі өлуге дейін жеткізу бабы бойынша қылмыстық іс қозғады.
Аудандағы оқиғаның мән-жайы туралы Ақмола облыстық полиция департаменті Ақпараттық саясат бөлімінің ерекше тапсырмалар жөніндегі аға инспекторы Әсем Әбдірахманова: «Алдын ала мәліметтер бойынша, Есіл ауданының 38 жастағы тұрғыны суицид жасаған. Сотқа дейінгі тергеп-тексеру амалдары жалғасуда, оқиғаның себептері мен мән-жайлары анықталып жатыр», — деп ресми мәлімдеме жасады.
