Миллиардер Владимир Ким мен оның серіктесі Эдуард Огайға тиесілі құрылымдар «Қазақмыс» корпорациясындағы 99,9 пайыз үлесті Qazaq Acquisition Corp. Ltd. компаниясына сатқан. Мәміленің жалпы өтемақысы 595,3 млрд теңгені, яғни шамамен 1,18 млрд долларды құрайды, деп жазады Alash.KZ.
Мәміле туралы келісімге 2025 жылғы 5 желтоқсанда қол қойылған. Ал 29 желтоқсанда Kazakhmys Copper «Қазақмыс» корпорациясына бақылауын толық тоқтатқан. Қазақстан қор биржасының мәліметінше, компанияның «Қазақмысқа» иелік етуі 2025 жылғы 30 желтоқсанда ресми түрде тоқтаған.
Мәміле шарттарына сәйкес, сатып алушы тараптың төлемі бірден толық көлемде жасалмаған. 2025 жылдың соңында Qazaq Acquisition Corp. Ltd. алдында 533,6 млрд теңге көлемінде берешек қалыптасқан.
Бұл сома Kazakhmys Copper-дің қаржылық есебінде қаржылық актив ретінде көрсетілген. 2025 жылғы 31 желтоқсанда оның әділ құны 531,5 млрд теңге болған. Ал мәміле бойынша бұрын жасалған төлемдерді қоса есептегендегі жалпы өтемақы 595,3 млрд теңгеге жеткен.
2026 жылы Qazaq Acquisition Corp. Ltd. мәміле бойынша қалған берешекті толық өтеген.
«Қазақмыстың» сатылуы компаниялар құрылымындағы өзгерістермен қатар жүрді. 2025 жылдың соңында корпорация жаңа акционерге өту процесін бастағанын ресми түрде хабарлаған. Сол кезде компания өндірістік процестерге, қызметкерлердің әлеуметтік кепілдіктеріне және жұмыс орындарының тұрақтылығына өзгеріс енгізілмейтінін мәлімдеді.
2026 жылғы наурызда «Қазақмыс» тобы активтердің бір бөлігін қайта ұйымдастыру аяқталғанын жариялады. Нәтижесінде корпорация құрамында тау-кен және металлургия бағытына қатысты бірқатар кәсіпорындар сақталды. Сонымен қатар энергетика, көмір және кейбір басқа компаниялар жаңартылған корпоративтік периметрден шығарылды.
2025 жылдың соңындағы мәлімет бойынша Kazakhmys Holding Limited компаниясының акционерлері Владимир Ким мен Эдуард Огай болған. Олардың үлесі тиісінше 70 және 30 пайыз деп көрсетілген.
Осылайша, «Қазақмыстың» сатылуы Ким мен Огай бақылайтын құрылымның компаниядағы негізгі активтерінің бірін басқа меншік иесіне беруімен аяқталды.
Қазіргі «Қазақмыс» тобының ресми мәліметінше, компания Қазақстандағы тау-кен және түсті металлургия саласындағы тігінен интеграцияланған холдинг болып саналады. Топтың негізгі активтері тау-кен өндірісі мен металлургия саласында шоғырланған. Компания мәліметінше, топта шамамен 38 мың адам еңбек етеді.
