АҚШ Президенті Дональд Трамп Иранмен жүргізіліп жатқан халықаралық келіссөздерге қатысты мәлімдеме жасап, екіжақты құжатқа түпкілікті қол қойылғанға дейін Иранға бағытталған шектеулер мен блокада шаралары еш өзгеріссіз қалатынын нақтылады, деп хабарлайды Alash.kz.
Жеке парақшасында көлемді жазба жариялаған АҚШ басшысы қазіргі уақытта процесс өте сындарлы сипатта өтіп жатқанын, алайда Вашингтон бұл мәселеде асығыстық танытпайтынын жеткізді. Сонымен қатар ол бұрынғы президент Барак Обаманың тұсында қабылданған ядролық мәмілені қатаң сынға алып, жаңа құжат Иранның жаппай қырып-жою қаруын иеленуіне жол бермейтінін баса айтты. Дональд Трамп өз мәлімдемесінде келіссөздердің барысына және АҚШ-тың ұстанымына тоқталып, былай деп жазды:
«Келіссөздер ұйымдасқан түрде және сындарлы сипатта өтіп жатыр. Мен өз өкілдеріме келісімшарт жасасуға асықпауды тапсырдым, өйткені уақыт біздің пайдамызда. Келісімге қол жеткізіліп, мақұлданып, қол қойылғанға дейін блокада толық күшінде қалады. Екі тарап та асықпай, бәрін дұрыс істеуі керек. Ешқандай қателікке жол берілмеуі тиіс».
Ақ үй басшысы бұған дейінгі әкімшіліктің жіберген кемшіліктерін тізіп, Барак Обаманың саясатына қатысты өз наразылығын төл сөзбен келесідей жеткізді:
«Еліміз жасасқан ең нашар мәмілелердің бірі — Барак Хусейн Обаманың ирандық ядролық келісімі болды. Ол Иранға ядролық қару жасауға тікелей жол ашып берді».
Трамп қазіргі жасалып жатқан құжаттың маңыздылығын атап өтіп, ресми Тегеранға ескерту жасаған сөзін де толық жариялады:
«Біздің Иранмен қарым-қатынасымыз кәсіби әрі нәтижелі бола түсуде. Дегенмен, олар ядролық қаруды дамыта да, иелене де алмайтынын түсінуі тиіс».
