Олимпиада чемпионы Елдос Сметов өзінің спорттық мансабындағы ең маңызды күндердің бірі туралы әлеуметтік желідегі парақшасында әсерлі жазба жариялады, деп жазады Alash.kz ұлттық порталы.
Дәл осы күні, бір жыл бұрын, ол Париж Олимпиадасында алтын медаль жеңіп алып, Қазақстанның көк байрағын биікте желбіретті.
Спортшы бұл жеңісті тек жеке жетістік емес, елдің абыройы мен сенімінің нәтижесі деп бағалайды.
“Ұшқыр арманға жеткен күн. Бұл – мен үшін ғана емес, қазақ елі үшін де тарихи сәт. Париж Олимпиадасының алтыны әрдайым жүрегімде сақталады. Бұл – маңдай тердің, тынымсыз еңбектің, талай түнгі жаттығулардың өтеуі”, – деп жазды Елдос Сметов.
Ол Олимпиадаға апарар жолдың оңай болмағанын, түрлі сәтсіздіктер мен қиындықтардың қатар жүргенін айтты.
Жеңіске жету жолында көптеген құрбандықтарға барғанын да жасырмады.
“Біз көп нәрседен бас тарттық: жайлы өмірден, жақындарымызбен өткізетін сәттерден. Бірақ дәл сол қиындықтар бізді нағыз спортшы етті”, – деді Сметов.
Олимпиададан кейін Елдос өмірінде жаңа кезең басталғанын айтып, енді уақытын отбасына және өзіне арнауға мүмкіндік туғанын жеткізді.
Сонымен қатар, атақты дзюдошы 2028 жылы Лос-Анджелесте өтетін келесі Олимпиадаға қатысып, осы тарихи жеңісті қайталауға ниетті екенін де мәлімдеді.
“Париждегі жеңіс біз алмайтын қамал жоқ екенін көрсетті. Алдағы Олимпиадада осы сезімді қазақ еліне тағы да сыйлау үшін бар күшімді саламын”, – деп жазды ол.
Елдос Сметовтің бұл жазбасы желіде қызу қолдауға ие болды. Жанкүйерлер оны тек мықты спортшы ғана емес, қайсар мінезді, ел үмітін ақтай білетін нағыз чемпион ретінде бағалауда.
