Украина президенті Владимир Зеленскийдің борты Кишинев әуежайынан Норвегияға ұшып шығар сәтте Молдованың әуе кеңістігіне ресейлік реактивті дрон кіріп кетіп, президент ұшағы ұшқышсыз аппаратпен соқтығысуға сәл қалды. Мұндай мәлімдемені Норвегия премьер-министрі Йонас Гар Стёре жасады, деп хабарлайды Alash.kz.
Оқиға Зеленский Харольд V корольмен қоштасу рәсіміне қатысу үшін Ослоға бет алған кезінде орын алған. Әуедегі қауіпті жағдайды Норвегия үкіметінің басшысы өз сөзінде растап, Украина лидерінің әрбір сапары жоғары тәуекелмен өтетінін жеткізді.
«Оның ұшағы Молдовадан ұшып шығуы тиіс болған сәтте дронмен соқтығысуға сәл қалды. Бұл — оның күнделікті бетпе-бет келіп отырған шынайы өмір шындығы», — деді Норвегия премьер-министрі Йонас Гар Стёре телеэфирде.
Жағдайдың болғанын украиналық жоғары лауазымды шенеунік те ресми түрде растады. Мәліметтерге сәйкес, президенттік борт Кишинев әуежайында ұшуға дайындалып жатқан уақытта Молдованың әуе кеңістігіне ресейлік реактивті дрон бұзып кірген.
Бұл жағдай шекара маңындағы әскери белсенділіктің шарықтау шегіне жеткен сәтінде орын алды. Өйткені Зеленский ұшардың алдындағы түнде Одесса облысының билігі Молдова шекарасына тікелей іргелес орналасқан «Староказачье» халықаралық автокөлік өткізу пунктіне дрондар шабуыл жасағанын хабарлаған еді. Қазіргі таңда қауіпсіздік шаралары одан әрі күшейтілді.
