Қазақстан мұнайының негізгі экспорттық бағыты саналатын «Каспий құбыр консорциумының» (КҚК) теңіз терминалына дәл мұнай тиеу сәтінде тағы да ұшқышсыз ұшатын аппаратпен (дрон) шабуыл жасалып, салдарынан шикізат жөнелту толықтай тоқтатылды, деп хабарлайды Alash.kz.
Консорциум таратқан мәліметке сәйкес, бұл жолғы шабуылға екі бірдей танкер тап болған. Оның біріншісі - «Теңізшевройл» компаниясының мұнайын қабылдап жатқан ASIA кемесі болса, екіншісі - Қашаған мен «ҚазМұнайГаздың» шикізатын тиеп жатқан NISSOS IOS танкері. Дрон соққысы салдарынан ASIA танкерінің аумағында өрт тұтанғанымен, тілсіз жау дер кезінде ауыздықталды. Оқиғадан зардап шеккендер тіркелген жоқ және суға мұнай төгілген жоқ, алайда қазіргі таңда кемелердің зақымдану деңгейі мамандар тарапынан нақтыланып жатыр.
Компания бұл жағдайды жай ғана қарулы шабуыл емес, халықаралық құқық нормаларымен қорғалатын азаматтық инфрақұрылым нысанына қарсы бағытталған террорлық әрекет деп айыптады. Бұл оқиға консорциумға қарасты стратегиялық нысандарға жасалған осымен бесінші шабуыл болып отыр.
Бұл төтенше жағдай Қазақстанның экономикалық мүддесі үшін аса қауіпті. Себебі аталған КҚК желісі арқылы еліміздегі ең ірі үш кен орны — Теңіз, Қашаған және Қарашығанақтың шикі мұнайы халықаралық нарыққа тасымалданады. Мәселен, өткен жылдың қорытындысы бойынша осы құбыр желісімен сыртқа 70,5 миллион тоннадан астам отандық мұнай экспортталған болатын.
Айта кетерлігі, «Каспий құбыр консорциумының» акционерлері қатарында Ресей Федерациясынан бөлек, Қазақстан, АҚШ және Батыс Еуропаның жетекші мұнай-газ алыптары бар. Осыған байланысты, аталған теңіз терминалына жасалған кез келген қарулы шабуыл тек Ресейдің ғана емес, тікелей Қазақстанның экспорттық әлеуетіне нұқсан келтіріп, жаһандық энергия қауіпсіздігіне үлкен қатер төндіретін оқиға ретінде қарастырылуда.
