АҚШ Орталық барлау басқармасының (ЦРУ) бұрынғы сарапшысы Рэй Макговерн Ресей әскері Украинадағы шабуылдарын бұрын-соңды болмаған деңгейде күшейткенін мәлімдеді, деп хабарлайды ALASH.KZ.
Ол YouTube арнасындағы сұхбатында Ресейдің ауқымды соққыларды жиілеткенін айтып, Украина әуе шабуылына қарсы қорғаныс жүйелерінің мүмкіндігі әлсірегенін жеткізді.
«Ресей бұрын болмаған ауқымдағы соққылар жасай бастады. Украинада әуе шабуылына қарсы қорғаныс жеткіліксіз. Кеше олар қолда қалған соңғы екі Patriot зымыранын пайдаланған сияқты. Егер жағдай осылай жалғасса, Ресей әскери-әуе күштері Украинаның кез келген аумағында әуеде басымдыққа ие болуы мүмкін. Сонымен қатар Ресейдің қолында қазіргі уақытта пайдаланып үлгергенінен де көп оқ-дәрі қоры бар», – деді Макговерн.
Сарапшының пікірінше, Ресейдің ядролық қару қолдануына негіз жоқ, өйткені оның айтуынша, Ресей майданда басымдыққа ие болып келеді. Ол соғыс қимылдарының қарқыны артқанын және алдағы негізгі мақсаттардың қатарында Славянск пен Краматорск қалалары бар екенін айтты.
Сонымен қатар Ресей Қорғаныс министрлігі соңғы бір тәулікте Харьков облысындағы Бакшеевка елді мекенін бақылауға алғанын хабарлады.
Министрліктің мәліметінше, Ресей күштері Украина Қарулы күштері пайдаланатын инфрақұрылым нысандарына, логистикалық орталықтарға, ұшқышсыз ұшу аппараттарын өндіретін орындарға, сондай-ақ украиналық бөлімшелер мен шетелдік жалдамалылардың уақытша орналасу бекеттеріне соққы жасауды жалғастырған.
Ресей Қорғаныс министрлігі қарсы тараптың бір тәуліктегі шығыны 1435-тен астам әскери қызметкерді, бір танкті, 13 броньды техниканы, 12 артиллериялық қондырғыны, үш радиоэлектрондық күрес станциясын және екі радиоэлектрондық барлау станциясын құрады деп мәлімдеді.
Айта кетейік, бұл ақпарат Ресей Қорғаныс министрлігі мен ЦРУ-дың бұрынғы сарапшысы Рэй Макговерннің мәлімдемелеріне негізделген. Соғыс жағдайында тараптардың жариялаған деректерін тәуелсіз түрде тексеру мүмкін емес.
