Соңғы жылдары Қазақстанда азаматтық белсенділік артып келеді. Алайда жаңа бастамаларға, қоғамдық қозғалыстарға және қоғам атынан сөйлеуге тырысатын тұлғаларға деген сеніммен қатар, күмән де көбейген, деп хабарлайды Alash.kz.
Осындай белсенді жастар қозғалыстарының бірі — «Жаңа адамдар». Қозғалыс Президенттің саяси бағытын ашық қолдайды, өңірлерде жұмыс жүргізіп келеді және сонымен бірге жергілікті деңгейде түрлі кедергілерге тап болып отырғанын айтады.
Informburo редакциясы қозғалыс белсенділері мен оның көшбасшысы Асель Баденовамен арнайы сұхбат өткізіп, азаматтық бастама мен саяси ұстанымның ара-жігі, қоғамның сенімі, қаржыландыру, ашықтық және азаматтық белсенділіктің шекаралары туралы тікелей әңгімелесті.
Асель Баденова қозғалыстың тәуелсіз жұмыс істейтінін және айтылған пікірлерде жасырын мағына жоқ екенін атап өтті. Оның айтуынша, адал азамат болу — бұл Отанға деген сүйіспеншілік пен жеке жауапкершілік.
«Азаматтық ұстаным сөзбен емес, әрекетпен көрінеді. Ол немқұрайлылыққа қарсы тұрудан, қоғамдық сананы өзгертуден және Әділетті Қазақстан үшін күнделікті еңбектен басталады», — дейді ол.
