Атырау-Ақтөбе бағытындағы жолаушылар пойызында жолаушы қайтыс болды, деп хабарлайды Alash.kz.
Пойыз Атырау станциясынан 12 шілдеде аттанып, келесі күні таңертең межелі жерге жеткен. Алдын ала тергеу барысында 44 жастағы ер адамның пойызға билетсіз мінгені анықталды. Алайда сапар кезінде жолаушының кенеттен жүрегі тоқтап қалған. Жолаушының вагонда заңсыз отырғанын жасыру мақсатында жолсерік марқұмның жеке куәлігін алып, оның атына ресми түрде билет сатып алған.
Осы жағдайға байланысты «Қазақстан темір жолы» ұлттық компаниясында шұғыл талқылау өтті. Қазіргі уақытта вагон жолсерігі мен осы учаске бастығына қатаң сөгіс жарияланды. Кінәлі тұлғаларға қатысты қызметтік тексеру жүріп жатыр және оның нәтижесі бойынша олардың теріс қорлық себептермен жұмыстан шығарылуы әбден мүмкін. Қазіргі уақытта істің мән-жайын полиция қызметкерлері де тексеруде.
