Әлеуметтік желілерде өте танымал Нұрлан имам "көзін тұмшалап, қара жамылатындарға" қатысты өз ойын айтты, деп хабарлайды Alash.kz ұлттық порталы.
Нұрлан имамның айтуынша, қара жамылу біздің дінімізде де, салтымызда да жоқ екен. Сондықтан ел болып, зиялы қауым болып осы үрдіспен күресуді айтты.
"Қара жамылу біздің өткенімізге де, кешелегімізге де, болашағымызға да сыймаған дүние. Құдайға деген сенім-тақуалығымыз көзіне дейін тұмшалаумен өлшенбейді. Отбасына дұрыс тәрбие беріп, қолынан келгенше қызметте болып, Отанына адал болу нағыз құдайға берілгендікті білдіреді",- деді ол.
Қоғам қайраткері, мәжіліс депутаты Мұрат Әбенов Нұрлан имамның осы айтқандарына қолдау білдіріп, мүфтиятқа дұрыс ойлы имамдардың керек-ақ екенін айтты.
Соңғы кезде қазақ ұлтының ежелден келе жатқан анау дәстүрі харам, мынау заты сәйкес келмейді, мына киім дұрыс емес деп араңдататын “уағыз” айтатындар көбейді.
“Домбыра тартпа, сәлем салма, бетті ашпа, тұсау кеспе” - деп халықты ашуын туғызатын насихатшылар пайда болды.
Қазақ ислам дінінің «Әбу Ханифа» мазһабын, яғни Ханафи бағытының байырғы түркілік салт-дәстүрдің ислам дініне қайшы келмейтін тұстарын сақтап қабылдаған.
Мысалы қазақ даласында адам қайтыс болғаннан кейін дүние-мүлкімен, мінген атымен жерлеу дәстүрі болғанын археологиялық қазбалардан көреміз.
Олар исламға қайшы келетін болғасын осы жерде тұрғандар сол баяғы кездерде ол дәстүрден бас тартқан.Демек, қазақтың осы кезге дейін орныққан салт-дәстүрлерінің бәрі дінмен үйлескен , сәйкес келтірілген ұлттық құндылық.
Оларды казір ревизия жасап, жоққа шығарудың қажеті жоқ.Бізге Ханафи мәзһабы Ислам құндылықтарын ұлттық салт-дәстүрлермен ұтымды ұштастыра білгені үшін аса маңызды,- деді ол.
