«МузАРТ» тобының танымал солисі Кенжебек Жанәбілов сырқаттанып қалғанын мәлімдеді, деп хабарлайды Alash.kz.
Бұл туралы әнші өзінің Instagram парақшасында жариялап, жүрек қан тамырларының бітелуі салдарынан жедел түрде медициналық көмекке жүгінуге мәжбүр болғанын жеткізді. Оның айтуынша, ақ халаттылардың дер кезінде жасаған ем-дом шараларының арқасында жансақтау бөлімінен қарапайым палатаға ауыстырылған.
Өнер иесі дәл осы күні Шымкент шаһарында жоспарланған шығармашылық кешке қатысуы тиіс екенін, алайда денсаулығына байланысты бұл сапарынан бас тартуға тура келгенін баяндады.
Бұл оқиғаға қатысты әнші:
«Бүгін Шымкентке ән кешіне баруым керек еді. Жүрек қан тамырларының бітелуіне байланысты @erensau.kz медицина орталығының мамандарының көмегімен жансақтау бөлімінен палатаға ауыстым. Дәрігерлерге, әсіресе Алмат Егізеков бастаған ұжымға мың алғыс! Дұғада болайық!», – деді.
Осылайша, ол өмірін арашалап қалған дәрігерлер ұжымына шексіз ризашылығын білдіріп, желідегі оқырмандарынан тілеулес болып, дұға етуді өтінді.
Қазіргі таңда эстрада жұлдызының денсаулығына қатысты өзге ресми мәліметтер жарияланған жоқ. Ал тыңдармандары мен жанкүйерлері әлеуметтік желіде жылы лебіздерін жазып, Кенжебек Жанәбіловтің тезірек сауығып, сахнаға аман-есен оралуын тілеп жатыр.
