Танымал әнші Роза Әлқожа соңғы күндері діни фанаттардың тарапынан соққыға тап болғанын жеткізді, деп жазады Alash.KZ
Оған себеп — той үстінде «әуен тыңдау күнә» деп мәлімдеме жасаған азаматтың темір торға қамалуына әншінің тікелей қатысы бар деген айыптаулар еді.
Айта кету керек, Түркістан өңіріндегі салтанатты жиындардың бірінде орын алған оқиға халық арасында қызу пікірталас тудырды. Нәтижесінде, тойда заңсыз насихат жүргізген ер адам құқық қорғау органдары тарапынан тұтқындалды. Осы жағдайдан кейін әншіні кінәлап, күйе жаққысы келетіндердің қатары күрт өскен.
«Кешеден бері осы мәселе төңірегінде ерегісіп жатырмыз. Біз де иманнан мақұрым емеспіз, Жаратушыдан қорқатын, Аллаға шүкіршілік ететін жандармыз. Менің туған бауырларымның барлығы — бес уақыт құлшылығын қаза қылмайтын азаматтар. Бірақ соған қарамастан, әсіре діншіл қауым бізге қарсы майдан ашып алды», — деп ағынан жарылды әнші.
Роза Әлқожаның сөзіне сүйенсек, қазіргі уақытта оған «қожа әулетінен шыға тұра, өз діндесіңе қарсы шықтың» деген айып тағатындар көбейген.
«Тек қожалар ғана емес, біздің барлығымыз — әлімсақтан бері исламды ұстанатын мұсылманбыз. Әрине, бұл діни жолды берік ұстанып, тақуалық деңгейге жеткендер де, біз сияқты оған шамасы жетпей жүргендер де бар. Кімнің шынайы адасып, кімнің тура жолда екенін тек бір Алла ғана көреді. Адам баласы болып жаратылған соң, Жаратқан иеміз бәрімізге шынайы құлшылық етуді жазсын. Ал бұл болған жағдай — заң мен қоғамымыздың өз үкімі. Мемлекеттің заңы бәріне ортақ. Ол адам дінді құбыжық етіп көрсетіп, өз сөзінен өзі шатылды. Мұның бәрі — Алланың бұйрығымен болған дүние», — деп түйіндеді өз ойын әнші.
