"Асылып қалған" - құқық қорғаушы Ринат Рафхаттың неден көз жұмғаны айтылды

23 желтоқсанда құқық қорғаушы әрі азаматтық белсенді Ринат Рафхаттың қайтыс болғаны туралы ақпарат тарады. Алғашында оның балық аулауға кетіп, оралмағаны хабарланған болатын, деп жазады Alash.KZ.

Кейін журналист Ораз Әлімбек марқұмның денесі сарайда асулы күйде табылғанын жазды. Дереккөздердің мәліметінше, қайғылы оқиға 22-інен 23-іне қараған түні болған. Ринат Рафхат сол күні ауылдастарымен бірге Қиғаш өзенінде демалғаны да расталды.

Алматыдағы дереккөздер соңғы уақытта Ринат Рафхат пен қоғам белсендісі Абзал Достияровтың жақын араласқанын айтады. Бұрын екеуі де оппозициялық саясаткер Жанболат Мамайды қолдағанымен, кейін ара-қатынастары суыған. Жұмыссыз қалған Ринат ауылына оралып, құқық қорғау қызметін Абзал Достияровпен бірге жалғастыруды жоспарлағаны айтылды.

Әлеуметтік желідегі жазбаларға қарағанда, Ринат Рафхат Алматыға баруды ойлаған. Алайда Абзал Достияров қауесет таратпауға шақырып, марқұмның жақын күндері Алматыға бару жоспары болмағанын жазды.

Ринат Рафхат Қазақстанда адам құқығы, әділ сот және заң үстемдігі мәселелерін ашық көтеріп жүрген белсенді ретінде танылған. Ол резонансты сот істеріне қатысып, қоғамдағы әділетсіздіктерді үнемі сынға алып отырған.