![](/uploads/images/20240224100028125.jpg)
– Тарих, филология, әлеуметтану, қоғамтану, саясаттану, журналистика ғылымында Алтынбектану деген бағытқа түрен салынды. Енді ғылыми негізде сараптап, Алтынбектей тұлғаның қалыптасуының негізі неде? Алтынбектің рухы кейінгі ұрпақтарға жұғысты болу үшін қайтпек керек? Қалай зерттеу керек? Қай бағытта, қай қырынан алып, саралау керек деген мәселелер қозғалды, – дейді конференция ұйымдастырушыларының бірі Сағатбек Медеубекұлы.
Жиында совет дәуірінде тәрбиеленіп, Мәскеуде білім алса да, "ұлтсызданбаған" саясаткердің "билік басында жүріп те, жүйенің қателіктерін көріп, соны дұрыстау үшін күш салғаны" айтылды. Саясаткердің өмірі мен саяси жолын зерттеу маңыздылығы сөз болды.
"Тәуелсіз елдің тәуелсіз азаматтары өздері үшін және болашақ ұрпағы үшін бейбіт саяси күресті бүгін бастаймын десе, Алтынбек Сәрсенбайұлының саяси мұрасы темірқазық болуға дайын" деді баяндамасын оқыған саясаттанушы Шалқар Нұрсейіт.
Конференция барысында Алтынбек Сәрсенбайұлының жазбалары мен ол туралы жазылған мақалалар топтастырылған екі кітап таныстырылды. Ұйымдастырушылар үшінші томға осы конференция барысында оқылған баяндамалар енгізілетінін жеткізді.
- Алтынбек Сәрсенбайұлы 1993-2001 жылдар аралығында қоғамдық келісім және ақпарат министрлігін басқарған. Кейін Қауіпсіздік кеңесінің хатшысы, Қазақстанның Ресейдегі елшісі болды. 2003 жылы оппозицияға өтіп, билікті сынады.
- 2006 жылдың 11 ақпанында Алтынбек Сәрсенбайұлы мен екі көмекшісін Ұлттық қауіпсіздік комитетінің "Арыстан" арнайы жасағының офицерлері ұрлап әкетіп, екі күннен кейін үшеуінің мәйіті Талғар ауданындағы Көктөбе ауылының маңындағы сайдан табылды. Қастандыққа тапсырыс беруші ретінде әуелі Сенат аппаратын басқарған Ержан Өтембаев айыпты деп танылды. Кейін бұл қылмыс экс-президент Нұрсұлтан Назарбаевтың бұрынғы күйеубаласы, марқұм Рахат Әлиев пен ҰҚК-нің экс-төрағасы Әлнұр Мұсаевқа таңылды.
- Осыған дейін Алматы облысында саясаткер оқыған мектепке Алтынбек Сәрсенбайұлының есімі берілген.