500 адам іздеп жатыр: Қырғызстанда көлік өзенге құлап, екі баланы ағыс алып кетті

Қырғызстанның Кегеті шатқалында қайғылы оқиға болды. 23 маусым күні демалысқа шыққан отбасының көлігі еңіс жерден сырғып кетіп, өзенге құлаған деп  хабарлайды Alash.kz .

Көлікте екі әйел мен бес бала болған. Олардың екеуі мен үш бала сыртқа шығып үлгергенімен, 12 жастағы қыз бен 6 жастағы ұлды қатты ағыс алып кеткен.

Қыз баланың мәйіті сол күні табылды. Ал 6 жастағы баланы іздеу жұмыстары бірнеше күннен бері жалғасып жатыр.

Қазіргі уақытта іздеу жұмыстарына 500-ге жуық адам тартылған. Олардың қатарында 360 құтқарушы, жергілікті тұрғындар және жоғалған баланың туыстары бар.

Құтқарушылар өзеннің қатты ағысы мен күрделі жағдайға қарамастан, баланы іздеу жұмыстарын тоқтатпай, тәулік бойы жұмыс істеп жатыр.