Қазақстан ұлттық құрамасының бұрынғы капитаны әрі «Атырау» клубының бас бапкері Самат Смақов ағылшындық «Бернлиде» өнер көрсететін 18 жастағы шабуылшы Дастан Сәтпаевтың жиі жарақат алуы бұрынғы тым артық ойын жүктемелерімен байланысты екенін мәлімдеді, деп хабарлайды Alash.kz.
Жас футболшы қазіргі уақытта жарақатынан кейін қалпына келіп жатыр және осы себепті қараша айындағы матчтарға арналған ұлттық құраманың тізіміне енмеген. Бапкердің айтуынша, бұрын жас ойыншыны қосалқы құрамнан бастап ұлттық құрама мен Чемпиондар лигасына дейінгі әртүрлі деңгейдегі ойындарға жаппай қатыстырған:
«Енді, анау айтқандай, бұрынғының бәрі қазір жарақат болып шығып жатыр ғой. Әрине, 17-18 жастағы жас баланы оңды-солды, жеткен жерге дейін ойната берді. Ал қазір сол шамадан тыс салмақтың салдары білініп, ағзасы сыр беріп жатыр», — деді бапкер Алматыда өткен QJL Awards жүлдесінің кулуарында.
Еске сала кетсек, Дастан Сәтпаев биыл тамыз айында «Челсиден» бір маусымға жалға алу құқығымен «Бернлиге» ауысқан болатын. 2 қарашада ағылшын клубының бас бапкері Фабио Челестини отандасымыздың әлі де сауығып жатқанын ресми түрде растады. Айта кетейік, Қазақстан ұлттық құрамасы Ұлттар лигасы аясында 13 қарашада сырт алаңда Молдовамен ойнаса, 16 қарашада Астанада Словакия құрамасын қабылдайды.
