Футболдан 2026 жылғы әлем чемпионатының шешуші финалдық кездесуінде Испания құрамасы қосымша уақытта Аргентинадан басым түсіп, әлем чемпионы атанды, деп хабарлайды Alash.kz.
АҚШ-тың Нью-Йорк агломерациясындағы Ист-Ратерфорд қаласының стадионында өткен бас матч 1:0 есебімен испаниялықтардың жеңісімен аяқталды. Ойынның негізгі уақытында қос команда да есеп аша алған жоқ. Матчтың 90+3-минутында аргентиналық Э. Фернандес қызыл қағаз алып, алаңнан қуылды. Сан жағынан басымдыққа ие болған «қызыл фурия» қосымша уақытта ширақ қимылдап, кездесу тағдырын шешті. Ойынның 106-минутында Ф. Торрес соққан жалғыз гол Испания құрамасына бас кубокты сыйлады.
Ал осы біріншіліктің қола жүлдесі үшін өткен бәсекеде Англия құрамасы Франциядан 6:4 есебімен басым түсіп, 3-орынды иеленді. Осылайша, Аргентина құрамасы күміс жүлдені місе тұтса, Франция құрамасы жарысты 4-орынмен қорытындылады.
Айта кетейік, Испания құрамасы осыған дейін 2010 жылы Оңтүстік Африка Республикасында (ОАР) өткен әлем чемпионатында тұңғыш рет жеңіске жеткен болатын.
