Зекет деген не? Мұсылман қағидасы бойынша зекет кімдерге беріледі, кімдерге берілмейді? Fatua_kz сайты осы сұрақтарға жауап іздеп, Қазақстан мұсылмандары Діни басқармасы "Шариғат және пәтуа" бөлімінің маманы Елбек Тасболатұлынан пікір сұрады, - деп хабарлайды Alash.kz.
Шариғат бойынша зекет - нисап көлеміне жететін дәулеті бар мұсылман кісінің алла разылығы үшін байлығының бір бөлігін жылына бір рет Құранда көрсетілген топтағы адамдарға беруі.
"Адам зекетті өзінің әкесіне, анасына, ата-апасына, баласы мен немерелеріне, әл-ауқатты бай адамдарға, мұсылман емес кісілерге және ерлі-зайыпты бір-біріне беруіне болмайды. Ал туған бауырлары, нағашылары және басқа да туыстарына зекет беруіне рұқсат етілген. Тіпті, керісінше, бұл сауапты, сүйкімді амал болып есептелінеді", - дейді Елбек Тасболатұлы.
Зекет кімдерге беріледі?
Құран кітапта "Тәубе" сүресінің 60-шы аятына сәйкес, зекет:
Бірінші, мұқтаждарға. Мұқтаж дегеніміз бай емес, нисаб мөлшерінде дүние-мүлкі жоқ адамдар;
Екінші, кедейлерге;
Үшінші, зекет жинаушыларға. Яғни зекетті таратуға, жеткізуге тағайындалған кісілер;
Төртінші, жүректері жұмсарған кісілерге. Бұл ислам дінін жаңа қабылдағандарға, дінді енді түсініп жатқан кісілер;
Бесінші, құл азат етуге;
Алтыншы, борышы бар кісілерге. Дүние-мүлкі нисаб мөлшеріне жетпейтін, қарызы бар адамдар;
Жетінші, алла жолындағы адамдар, дін қызметкерлері;
Сегізінші, жолаушыға. Өз елінде дүние-мүлкі болса да жолда ақшасыз қалып қойған кісілер.
