Қазақстан Ұлттық қауіпсіздік комитеті (ҰҚК) төрағасының орынбасары болып Әли Алтынбаев тағайындалды. Ол бұған дейін мемлекеттік кіріс комитетін басқарып келген.
2021 жылы кіріс комитеті төрағасы болып тағайындалғанға дейін Алтынбаев Алматы қаласы бойынша экономикалық тергеу департаменті басшысы болған. 2000 жылдардан бері салық инспекциясында түрлі қызметте істеген.
Алтынбаевтың кімнің орнына келгені әзірге хабарланған жоқ. Қазір ҰҚК сайтында бірінші орынбасарды санамағанда алты орынбасардың аты-жөні көрсетілген. Бұған дейін билік ҰҚК-ін жаңартып, комитеттің жекелеген бөлімдерін қайта құратынын мәлімдеген.
Қаңтар оқиғасынан кейін ҰҚК төрағасының бұрынғы орынбасары – "А" арнайы мақсаттағы қызметінің бастығы Әнуар Садықұлов пен Дәулет Ерғожин қамалды. Олар "билікті күшпен басып алу және лауазым өкілетін асыра пайдалану" бабымен күдікке ілінген.
23 ақпанда комитет төрағасының тағы бір орынбасары Марат Өсіповтің сот санкциясымен қамауға алынып, оған "лауазымын асыра пайдаланды" деген айып тағылды.
ҰҚК төрағысы болған Кәрім Мәсімов Қаңтар оқиғасы кезінде орнынан алынып, тұтқындалған. Оның бірінші орынбасары қызметін Назарбаевтың немере інісі Самат Әбіш атқарып келген еді. Ол да қаңтардағы қырғыннан соң қызметтен кетті. Оның Қаңтар оқиғасына қатысы бар -жоғы айтылмады.
ҰҚК төрағасы Кәрім Мәсімов "мемлекетке опасыздық жасады" деген күдікке ілініп, 8 қаңтарда қамауға алынған. Арнайы қызмет мемлекетке сатқындық жасау, билікті күшпен басып алуға талпыну, аса ірі көлемде пара алу айыптары бойынша қощғалған 15 істі тергеп жатыр.
