Мәжіліс депутаты Ардақ Назаров Парламент кулуарында журналистердің өзіне қатысты қойған сұраққа жауап беруден бас тартты, деп жазады Alash.kz Ulysmedia порталына сілтеме жасап.
Ол депутаттық мандатын тапсыру ықтималдығы туралы сауалды жауапсыз қалдырып, тілшіге қатысты дөрекі мінез көрсетті.
Оқиға Мәжіліс ғимаратының дәлізінде, жалпы отырыстан кейінгі үзіліс кезінде орын алды. «Ulysmedia» порталының тілшісі халық қалаулысына жақындап, оның қызметінен кетуге дайындығы туралы тікелей сұрақ қойған болатын. Алайда депутат бұл тақырыпта сөйлесуден үзілді-кесілді бас тартып, журналистің жұмысына кедергі келтірді.
Ардақ Назаров БАҚ өкілінің сауалына келесідей жауап қайтарды: «Сұрақ қоюға болмайды. Не үшін жауап беремін? Кейін жауап беремін». Осы сөздерді айту барысында ол тілшіні түсірілім жасап тұрған телефонын қолымен итеріп жіберген.
Қазіргі уақытта депутаттың мұндай әрекеті қоғам мен кәсіби ортада талқыланып жатыр. Айта кетейік, бұған дейін де бірқатар қоғам белсенділері мен БАҚ өкілдері Ардақ Назаровтың депутаттық қызметіне қатысты түрлі сауалдар көтеріп келген болатын. Депутат тарапынан ресми мәлімдеме әзірге жасалған жоқ.
