Сенат депутаттары «Психологиялық қызмет туралы» заңды мақұлдады

Депутат Әсем Рахметованың айтуынша, заң психологтарға арналған кәсіби стандартты енгізуді көздейд  деп хабарлайды Alash.kz .
Құжатта мамандардың ғылыми негізделген әдістерді қолдануы міндеттеліп, олардың кәсіби дамуын қолдауға бағытталған супервизия институты енгізіледі.

Сондай-ақ психологтардың мемлекеттік тізілімі құрылады. Рахметованың сөзінше, бұл тізілімге енген мамандар өздерінің кәсіби қызметінің сапасы үшін жауапты болады.

«Ғылым және жоғары білім министрлігінің мәліметіне сәйкес, психологтарды даярлауды 43 жоғары оқу орны жүзеге асырады. Бакалавриат, магистратура және докторантура бағдарламалары бойынша шамамен 17 мың студент білім алуда, ал жыл сайын 4 мыңға жуық маман оқуын аяқтайды», – деді депутат.

Оның айтуынша, Қазақстанның барлық өңірлерінде психологиялық қолдау орталықтары жұмыс істейді. Өткен жылы олар шамамен 50 мың психологиялық кеңес берген.