Иран билігі 2024 жылдың желтоқсанында YouTube желісінде хиджабсыз патриоттық ән орындаған 29 жастағы әнші Парасту Ахмади мен оның шығармашылық тобының сегіз мүшесін 74 дүре соғу жазасына кесті, деп хабарлайды Alash.kz.
Аталған өнер көрсету шарасы ешқандай көрерменсіз, көне керуен-сарай ішінде өтіп, әлеуметтік желіде тікелей эфирде трансляцияланған болатын. Сахнаға қара көйлек киіп, шашын жайып және мойнына Иран картасы бейнеленген алқа тағып шыққан Парасту Ахмади «Отан жастарының қанынан» атты патриоттық туындыны шырқаған. Алайда, миллиондаған қаралым жинаған бұл 27 минуттық бейнежазбаны ел билігі «әдепсіз және аморалық контент» деп тауып, әнші мен оның музыканттарын тұтқындады. Іс жүзінде бұл жаза әйел адамның басына орамал тақпай, жалпыға ортақ аралас аудитория алдында жеке ән салғаны үшін беріліп отыр, себебі Иран заңнамасында мұндай әрекеттерге мүлдем тыйым салынған және бұл өнер көрсету наразылық акциясы ретінде бағаланды.
Сот шешімімен бекітілген тән жазасынан бөлек, сотталған өнерпаздардың барлығына алдағы екі жыл бойы Иран аумағынан тыс жерлерге шығуға және қандай да бір шығармашылық қызметпен айналысуға ресми түрде шектеу қойылды.
