Мұнай бағасы төмендеді. Иран Ормуз бұғазын бақылауға алуы мүмкін, деп хабарлайды ALASH.KZ.
6 тамызда әлемдік мұнай бағасы төмендеді. Бұған Иран мен Оман арасындағы келіссөздердегі ілгерілеу туралы ақпарат себеп болды. Сарапшылардың пікірінше, бұл АҚШ пен Иран арасындағы ықтимал бейбіт келісімге жол ашып, Ормуз бұғазының ашылуына ықпал етуі мүмкін.
Соңғы мәліметтерге сәйкес, Brent маркалы мұнайдың бағасы тағы шамамен 0,5 пайызға арзандады. Нарық қатысушылары Тегеран мен Маскат арасындағы келіссөздердің барысын жіті бақылап отыр.
Nomura Securities компаниясының экономисі Юки Такашиманың айтуынша, келіссөздердегі оң өзгерістер туралы хабарлардан кейін нарықта сатушылар белсенді бола бастаған.
– Иран мен Оман арасындағы келіссөздердегі ілгерілеу туралы ақпараттан кейін мұнай бағасы бұрынғы деңгейіне қайта түсті. Бағалар АҚШ пен Иран аралық келісімге келген 17 маусымдағы көрсеткішке оралды, – деді сарапшы.
Reuters агенттігінің хабарлауынша, Иран мен Оман Ормуз бұғазы арқылы Парсы шығанағына кіретін кемелерге бақылау жасау мәселесін талқылап жатыр. Егер келісім жүзеге асса, бұл Иранға жасалған ең ірі саяси ымыралардың бірі болуы мүмкін.
Агенттік бұл ақпаратты жоғары лауазымды ирандық шенеунік пен өңірдегі екі дереккөзге сілтеме жасап жариялады.
